Sunday, 20 May 2012 01:21 pm, Nepal
कैलाली, ५ कात्तिक : सरकारले घोषणा गरेको राष्ट्रिय साक्षरता अभियान बझाङ जिल्लामा सुरु हुन सकेन । यही कात्तिक १ गतेबाट सुरु गर्ने भनिएको सो अभियान गाविस सचिवको लापरबाहीका कारण सुरु हुन नसकेको हो । जिल्लाका ४७ वटा गाविसमा साक्षरता कक्षा सञ्चालन गर्न जिल्ला शिक्षा कार्यालयले गाविसको खातामा रकम निकासा गरिसकेको बताइएको छ ।
साक्षरता अभियान सञ्चालनका लागि गाविसले आवश्यक शैक्षिक सामग्री र स्टेसनरी खरिदसमेत नगरेको जनाइएको छ ।
जिल्ला शिक्षा कार्यालयका अनुसार साक्षरता कक्षा पढाउने र निरीक्षकको छनोट नभएका कारण सो अभियान सञ्चालनमा कठिनाइ आएको छ ।
गाविस सचिवलाई पटकपटक साक्षरता कक्षा सञ्चालनका लागि पत्राचार गर्दै आएको र तिहारपछि त्यसलाई निरन्तरता दिन आफू लागिपर्ने जिल्ला शिक्षा अधिकारी शङ्कर विष्टले बताउनुभयो ।
उहाँका अनुसार जिल्लामा १३७ वटा साक्षरता कक्षा सञ्चालन गर्न सात करोड बजेट छुट्याएको छ । सो साक्षरता कक्षा सञ्चालनबाट जिल्लाका १२ हजारभन्दा बढी निरक्षरलाई साक्षर बनाइने बताइएको छ ।