Sunday, 20 May 2012 01:35 pm, Nepal
सोलुखुम्बु, २६ कात्तिक : सोलुखुम्बुको खुम्बु क्षेत्र र फाप्लुमा खराब मौसमका कारण आज तेन्जिङ हिलारी विमानस्थल लुक्लामा सीता एयरका दुईवटा डोनियर विमानले मात्र उडान भरेका छन् भने फाप्लुमा कुनै उडान हुन सकेन । उडान हुन नसक्दा लुक्लामा तीन सय ९० भन्दा बढी पर्यटक आज काठमाडौँ जान पाएनन् भने फाप्लुबाट १५ जनाभन्दा बढी पर्यटक काठमाडौँ जान पाएका छैनन् ।
आज दिउँसो मौसममा आंशिक खराबी आए पनि साँझ ५ बजेदेखि बाक्लो हुस्सु र सिमसिम पानी परेकाले पर्यटक तथा आसपासका जनजीवन प्रभावित बनेको लुक्लाका स्थानीय बासिन्दा सूर्य थुलुङले बताउनुभयो ।
सोलुखुम्बुको मौसममा खराबी आएपछि तेन्जिङ हिलारी विमानस्थल लुक्ला र फाप्लुको हवाई उडान प्रभावित भएको छ । लुक्लामा दैनिक ५० भन्दा बढी उडान हुने र फाप्लुमा पाँचभन्दा बढी उडान हुने विमानस्थलमा उडान नहुँदा सोलुखुम्बुबाट काठमाडौँ जाने स्वदेशी तथा विदेशी नागरिक मर्कामा परेका छन् ।
तत्काल काठमाडौँ पुग्नुपर्ने पर्यटकलाई फिस्टेल, सिम्रिक र माउन्टेन हेलिकप्टरबाट १२ वटा उडान भरी ६० जना पर्यटकलाई काठमाडौँ पठाइएको नागरिक उड्ड्यन प्राधिकरण लुक्लाले जनाएको छ ।
आज बेलुकाको मौसमको छाँटकाँट हेर्दा भोलि पनि मौसम खुल्ने कि नखुल्ने भन्ने बारेमा केही भन्न नसक्ने स्थिति रहेको फाप्लु नागरिक उड्ड्यन प्राधिकरणले जनाएको छ ।