Sunday, 20 May 2012 03:02 pm, Nepal
महोत्तरी, २ माघ : महोत्तरीको मनरा–९ चौरियाबाट बिहीबार बिहान अपहरणमा परेका दुई बालक आज अपहरणमुक्त भएका छन् । चौरिया बस्ने किसुन मण्डलका छोरा १४ वर्षीय नरेश र नागेन्द्र मण्डलका छोरा पाँच वर्षीय शम्भुलाई अपहरणकारीहरुले आज दिउँसो १ः०० बजे महोत्तरीको सदरमुकाम जलेश्वर नगरपालिका अगाडि छाडेका छन् ।
अपहरणकारी धनुषा जिल्ला ढल्केवर गाविस–३ बस्ने प्रमोद बुढाथोकीका बुबा सूर्यबहादुरलाई प्रहरीले आइतबार नियन्त्रणमा लिएपछि चार दिनदेखि अपहरणमा रहेका बालक, दुवैलाई अपहरणकारीले आज जलेश्वरमा गोप्यरुपमा राखेर भागेका छन् ।
अपहरणकारीले पीडित परिवारसँग शुक्रबार रातिदेखि रु १२ लाख र रु सात लाख फिरौती माग्दै आएकामा जिल्ला प्रहरीका नायब प्रहरी उपरीक्षक केदार खनालको अथक प्रयासले बालकद्वय निशर्त रिहा भएका छन् ।
नगरपालिका चोकमा भेटाएका बालकद्वय अहिले जिल्ला प्रहरी कार्यालयमा रहेका छन् भने परिवारजन घरबाट आइरहेका छन् ।