Sunday, 20 May 2012 03:03 pm, Nepal
ताप्लेजुङ, २ माघ : दुई सातादेखि परेको हिमपातका कारण हिमाली जिल्ला ताप्लेजुङको जनजीवन नराम्ररी प्रभावित भएको छ । हिमपातका कारण चिसो बढेपछि मानिसहरूको दिनचर्या निक्कै कष्टकर बनेको छ । गत शुक्रबारदेखि मौसममा केही सुधार आई घाम लागे पनि आइतबार बिहानैदेखि हिमाली क्षेत्रमा पुनः हिउँ पर्न सुरु भएको र लगातारको हिमपातले जनजीवन प्रभावित भएको स्थानीयवासीले बताएका छन् ।
जिल्लाका ५० मध्ये दुई दर्जनभन्दा बढी हिमाली गाविसमा बाक्लो हिमपात भएको छ । अग्ला डाँडाकाँडा हिउँले भरिएपछि बढेको चिसोले सिङ्गो जिल्लाकै जनजीवन कष्टकर बनेको छ ।
चिसोले बालबालिका, वृद्धवृद्धा र पशु चौपाया बढी प्रभावित भएका छन् ।
जिल्लाको ओलाङ्चुङगोला, घुन्सा, याङ्मा, फलेलगायतका बस्तीहरूमा तीनदेखि पाँच फिटसम्म हिउँ जमेको स्थानीयवासीले बताएका छन् ।
हिउँका कारण पधेँरो तथा धाराहरूमा पानी जमेकाले खानेपानीमा समस्या भएको छ । यत्तिखेर बस्ती नजिकैको तमोर नदीबाट पानी ल्याएर पिउने गरेको ओलाङ्चुङ्गोलाका स्थानीय छेतेनडण्डु शेर्पाले बताउनुभयो ।
ओलाङ्चुङगोला, याङ्मा र घुन्साका बासिन्दाले खाद्यान्नलगायत दैनिक उपभोगका सामग्री तिब्बतबाट आपूर्ति गर्ने गरेकामा हिमपातका कारण बाटो बन्द भएपछि खाद्यान्नको अभावसमेत देखिन थालेको बताइएको छ ।