Sunday, 20 May 2012 03:18 pm, Nepal
सुनसरी, ९ माघ : पूर्व–पश्चिम राजमार्ग अन्तर्गत सुनसरीको पकलीमा आज बिहान मालबाहक ट्रक पल्टिँदा सात जनाको मृत्यु भएको छ । दुर्घटनामा परी घाइते भएका पकली–३ का ६५ वर्षीय कृष्ण राउत, ४० वर्षीय तारा राउत र ४२ वर्षीय बाबुराम राउतको उपचारका क्रममा मृत्यु भएको हो । यस्तै दुर्घटनामा ३५ वर्षीय कमला केसी, दिक्षा राउत र ९ वर्षीय बालिका शारदा राउतको पनि मृत्यु भएको छ ।
पश्चिमबाट चामल लिएर पूर्वतर्फ जाँदै गरेको ना ४ ख ७९६ नम्बरको ट्रक अनियन्त्रित भई विपरीत साइडमा पल्टिँदा काठमाण्डौ आउने बस चढ्न सडक छेउमा बसेका उनीहरुलाई ट्रकले किचेको प्रहरीले जनाएको छ । घाइते चार जनाको इटहरी र धरानमा उपचार भइरहेकोे छ । यसैबीच, पूर्वपश्चिम राजमार्ग अन्तर्गत मोरङको डाँगीहाटमा गएराति भएको मोटरसाईकल दुर्घटनामा २ जनाको मृत्यु भएको छ । विराटनगर १७ का पंकजराज घिमिरे र दोलखाका उत्तम पोखरेलको मृत्यु भएको इलाका प्रहरी कार्यालय बेलबारीले जनाएको छ ।