Tuesday, 22 May 2012 03:01 pm, Nepal
गजुरी (धादिङ), १३ माघ : राष्ट्रपति रामवरण यादवले राष्ट्रको एकता, भौगोलिक अखण्डता र राष्ट्रिय स्वाभिमान बचाउन राजनीतिक दलहरुलाई आग्रह गर्नुभएको छ । धादिङको बैरेनी गाविस–९ मा रहेको बागेश्वरी उच्चमाध्यमिक विद्यालयको स्वर्ण महोत्वसको उद्घाटन गर्दै राष्ट्रपति यादवले सो कुरा बताउनुभएको हो ।
उहाँले जनताले लोकतान्त्रिक गणतन्त्रको सस्ंथागत विकास, शान्ति प्रक्रियाको सफलता र लोतान्त्रिक गणतान्त्रिक संविधान चाहेकाले नेपालीको अनुहार उज्यालो पार्ने हो भने राजनीतिक दलहरु र सरकारले यस कुरालाई ध्यान दिनुपर्ने बताउनुभयो ।
राष्ट्रपति डा यादवले सबै पार्टीका नेताले सोचेर देशको आर्थिक सामाजिक र सांस्कृतिक विकास गर्नका लागि अपिल गर्दै जलस्रोत र पर्यावरणका रुपमा रहेको अपार वनजङ्गललाई जोगाउनुपर्नेमा जोड दिनुभयो ।
वनजङ्गलको संरक्षण नगर्ने र हाल नासिँदै गएको चुरेको चुरे क्षेत्रलाई जगेर्ना नगर्ने हो भने आगामी २०÷३० वर्षमा हिमालमा हिउँ नरहने र तराईमा पानी खान नपाइने स्थिति आउने बताउँदै उहाँले संसद, मन्त्री, राजनीतिक दलहरुले तत्कालै यसबारेमा सोच्न आग्रह गर्नुभयो ।
स्वर्णमहोत्सव उद्घाटन कार्यक्रममा विज्ञात तथा प्रविधिमन्त्री कल्पना धमला, सभासद् शालिकराम जमरकट्टेल, पूर्वस्थानीय विकासमन्त्री राजेन्द्रप्रसाद पाण्डे, पूर्वशिक्षामन्त्री गङ्गालाल तुलाधरलगायतको उपस्थिति रहेको थियो ।
विसं २०१९ मा चौताराबाट सुरु भएको सो विद्यालय अहिले सुविधा सम्पन्न भवन, विज्ञान ल्याब, पुस्तकालय रहेको छ । रासस