Tuesday, 22 May 2012 03:12 pm, Nepal
उर्लाबारी, १७ माघ : बेश्यावृत्ति गर्ने, गराउने आरोप लागेका यहाँका होटल व्यवसायीहरूले नै बेश्यावृत्तिको विरोध गरेका छन् । होटल तथा पेय पदार्थ व्यवसायी सङ्घ उर्लाबारीको १३ आँैं स्थापना दिवसको अवसरमा आज मोरङको उर्लाबारीमा आयोजित कार्यक्रमका वक्ताहरूले होटललाई स्वच्छ व्यवसायका रूपमा सञ्चालन गर्न सङ्गठित हुनुपर्ने आवश्यकता औँल्याए ।
सङ्घका सल्लाहकार मनोहरि दाहालले होटल व्यवसायका नाममा बेश्यावृत्ति र ठगी गर्नेलाई छुट दिन नहुने बताउनुभयो ।
सङ्घका सदस्य मुक्ति न्यौपानेले राज्यले निषेध गरेको क्रियाकलाप होटल व्यवसायभित्र गरिन्छ भने त्यसलाई सङ्गठनले विरोध गर्नुपर्नेमा जोड दिनुभयो ।
सङ्घका अध्यक्ष टेकबहादुर कार्कीको सभापतित्वमा भएको सो कार्यक्रममा संस्थापक अध्यक्ष रामकुमार राई, वरिष्ठ उपाध्यक्ष नराहाङ राई र सशस्त्र प्रहरी निरीक्षक धनबहादुर बोहोराले पनि बोल्नुभएको थियो ।
विसं २०५६ सालमा स्थापित सो सङ्घमा पूर्वी मोरङका ११ वटा गाविसमा सञ्चालित ३८० होटल आबद्ध छन् ।