Tuesday, 22 May 2012 03:19 pm, Nepal
बर्दिवास, २१ माघ : आफ्ना १० सूत्रीय माग अघि सार्दै महोत्तरी जिल्लाको सदरमुकाम जलेश्वरमा गत मङ्गलबार आमरण अनशन सुरु गरेका एक सामाजिक कार्यकर्ताको स्वास्थ्य अवस्था बिग्रँदै गएको छ । जिल्लामा रातु नदीले गर्ने गरेको क्षति न्यूनीकरण गर्न तटबन्ध निर्माण, भूस्खलन, वन र पर्यावरण जोगाउन विशेष बजेटको माग गर्दै आमरण अनशनमा बसेका जिल्लाकै सुगाभवानीपट्टिका ४० वर्षीय सुरेश पाण्डेको स्वास्थ्य अवस्था नाजुक बन्दै गएको उहाँको स्वास्थ्य परीक्षणमा संलग्न स्वास्थ्यकर्मीले बताएका छन् ।
अनशनकारी पाण्डेमा हेमोग्लोबिनको मात्रा निकै घटेर उहाँ कमजोर हुनुभएको जिल्ला स्वास्थ्य कार्यालयका वरिष्ठ स्वास्थ्यकर्मी गिरेन्द्र झाले बताउनुभयो ।
पाण्डेको मागपत्रमा धनुषा जिल्लाको महेन्द्रनगरस्थित एभरेस्ट पेपर मिलले बिग्ही नदीमा झारेको दूषित पानी सर्वोच्च अदालतको आदेशअनुसार व्यवस्थित गर्नुपर्ने, जलेश्वरमा मणिपाल कलेजको निर्माण कार्य तत्काल सुरु हुनुपर्ने र सदरमुकामबाहिर रहेका जिल्लास्थित सरकारी कार्यालय सदरमुकाम ल्याउनुपर्नेलगायत रहेका छन् । रासस