Tuesday, 22 May 2012 03:40 pm, Nepal
काठमाडौं, २५ माघ : व्यवस्थापिका संसदको बैठक आज दिउँसो १ बजेका लागि बोलाइएको छ । जनसत्ताले गरेको घरजग्गा र सम्पत्तिसम्बन्धी कारोबारलाई वैधता दिने सरकारी निर्णय फिर्ता लिन माग गर्दै आएका प्रतिपक्षी दलहरूको अडानका कारण संसदको बैठक प्रभावित हुँदै आएको छ ।
उनीहरूले निर्णयका विषयमा प्रधानमन्त्री डा. बाबुराम भट्टराईले नै संसदमा आएर जवाफ दिनुपर्ने अडान राख्दै आएपछि संसदको काम कारवाही सुचारु हुन सकेको छैन ।
यसैबीच नियमावली संशोधन मस्यौदा समितिले संविधानसभा नियमावली संशोधन मस्यौदालाई अन्तिम रुप दिन आज छलफल गर्ने भएको छ । समितिमा पटक पटक छलफल भएपनि मतैक्यता नभएकोले नियमावलीलाई अन्तिम रुप दिन सकिएको छैन । समितिमा राज्य पुनःसंरचना आयोगको प्रतिवेदनमाथिको छलफल प्रक्रिया, सहमति जुट्न नसकेका विषयमा फागुन १ गतेदेखि अन्तिम रुप दिन मतदानको प्रक्रियालगायतका विषयमा विवाद देखिएको छ ।