नेपाल कृषि प्रधान देश हो भन्दै आइएपनि पछिल्लो समय त्यस्तो अवस्था देखिंन छोड्दै गएकोछ । नेपालका उर्वर जमिनहरु एकपछि अर्को गर्दै बाँझिन थालेका छन् । गाउँका खेतबारी बाँझो बन्ने र युवा शक्ति सके विदेश र नसके शहर पस्ने कुराले आजकाल नेपालका गाउँ वस्तिहरु एकपछि अर्को गर्दै उजाड बन्दै गइरहेको छ । 

देशभरी त्यसो भैरहँदा काभ्रेपलाञ्चोक जिल्लापनि अछुतो रहन सकेको छैन । यो राजधानी शहर काठमाडौंबाट सबैभन्दा नजिक रहेको उर्वर कृषि भूमी हो । अझ दुग्ध र दुग्धजन्य पदार्थ उत्पादनको हिसाबले काभ्रे आत्मनिर्भर जिल्ला समेत । पछिल्लो लामो समयदेखि बिक्री गरेको दुधको भुक्तानी पाउन नसकेको, दुधको विक्रि वितरणमा समस्या आउन थालेको कुराले समग्र किसानमाहरुमा चिन्ता वढ्न थालेको छ । 

यसै सन्दर्भमा देशभरका १५ भन्दा वढी प्रत्यक्ष तथा अप्रत्यक्ष रुपमा किसानहरुको नेतृत्व गर्ने संघ÷संगठनहरुले पछिल्लो समय दुग्ध उत्पादक किसानहरुका माग सम्बोधनमा सरकार गम्भीर नभएको भन्दै काठमाडौंमा पत्रकार सम्मेलन गरेर केहि दिन अघि आन्दोलनका कार्यक्रमहरु सार्वजनिक गरेको हो ।  

नेपाल किसान महासंघ, अखिल नेपाल किसान महासंघ, राष्ट्रिय प्रजातान्त्रिक किसान संगठन, केन्द्रीय दुग्ध सहकारी संघ, नेपाल दुग्ध व्यवसायी संघ लगायत १५ भन्दा वढी किसान संगठनले संयुक्त आन्दोलनको घोषणा गरेका हुन् । किसानहरुले उत्पादन गरेको दुग्ध सहज ढंगले विक्री हुन नसकेको र दुग्धजन्य पदार्थ उत्पादन तथा बिक्री वितरणमा भोग्नु परेको समस्या जस्ता थुप्रै कृषिजन्य समस्याको समाधान गर्न सरकारले चासो नदिएको भन्दै वाध्य भएर आन्दोलनमा उत्रिनु परेको बताइएको छ ।