बनेपा– काभ्रे जिल्लामा फूटबल खेलको विकासका लागि स्थापना गरिएको बनेपा फूटबल एकेडेमी बनेपाले पहिलोपटक विद्यार्थीहरुको विदाको समय पारेर प्रशिक्षण क्याम्पस सञ्चालन गर्ने भएको छ । विद्यालयहरुमा जाडो विदा हुने समय पारेर यही पुस १९ गतेदेखि १५ दिन लामो क्याम्पस सञ्चालन गर्न लागिएको एकेडेमीका अध्यक्ष निरोज शाक्यले बताए । ‘विदाको समयमा विद्यार्थीहरु खाली बस्ने हुँदा कुलतमा नलागुन् र खेलप्रति आकर्षण बढोस् भन्ने उद्देश्यले क्याम्प सञ्चालन गर्न लागिएको हो’ शाक्यले भने । क्याम्पमा ८ बर्षदेखि १६ वर्ष उमेर समूहका बालबालिकाले सहभागिता जनाउन पाउने शाक्यले बताएका छन् । क्याम्पमा सहभागी हुन १५ सय रुपैयाँ शुल्क तोकिएको छ । 

राष्ट्रियस्तरका फूटबल खेलाडी उत्पादन गर्ने उद्देश्यले बनेपा एकेडेमी स्थापना गरिएको हो । जिल्लामै रहेका माउन्ट एभरेष्ट फूटबल क्लब र बनेपा फूटबल क्लब मिलेर २ वर्षअघि एकेडेमी स्थापना गरिएको थियो । एकेडेमीमा दैनिक ६० जना बालबालिकाले प्रशिक्षण लिँदै आएका छन् । एकेडेमीका उपाध्यक्ष मनिष भोछिभोयाका अनुसार एकेडेमीमा प्रशिक्षण लिएका खेलाडीहरु सम्मिलित खेलाडीहरु सहभागी माउन्ट एभरेष्ट फुटबल क्लब २०८१ सालको जिल्ला लिगमा पहिलो र बनेपा फुटबल क्लब दोस्रो हुन सफल छन् । यस्तै २०८० सालमा अण्डर १४ खेलाडी छनोटमा एकेडमीबाट ३ जना खेलाडी छनोट भएका थिए भने २०८१ को अण्डर १६ छनोटमा ४ जना खेलाडीहरु केन्द्रीय छनोटसम्म पुग्न सफल भए ।

पत्रकार सम्मेलनमा काभ्रे जिल्ला फुटबल संघका अध्यक्षसमेत रहेका एन्फाका केन्द्रीय सदस्य विकास नारायण श्रेष्ठले जिल्ला फुटबल संघ र एन्फाले एकेडेमीलाई निरन्तर प्राविधिक सहयोग गर्दै आइरहेको बताए । पत्रकार महासंघ काभ्रेका अध्यक्ष विनोद न्यौपानेले एकेडेमीलाई स्थानीय, प्रदेश र संघ सरकारले सहयोग गरेमा काभ्रेमा राष्ट्रियस्तरका फूटबल खेलाडीहरु उत्पादन हुने बताए ।