बनेपा-बनेपा नगरपालिका-१२ बासडोलमा रहेको श्री बासडोल सामुदायिक बहुउद्देश्यीय सहकारी संस्थाको १८ औं वार्षिकोत्सव आज मंगलबार सम्पन्न भएको छ । वार्षिकोत्सवको अवसरमा संस्थाले रक्तदान कार्यक्रम आयोजना गरेको थियो ।

कार्यक्रममा कुल १८ जनाले रक्तदान गरेका छन् । संस्थाका अध्यक्ष सुरेन्द्र महतको अध्यक्षता एवं बनेपा नगरपालिका वडा नं १२ का वडा अध्यक्ष राम बहादुर कुँवरको प्रमुख आतिथ्यतामा कार्यक्रम सम्पन्न भएको थियो । कार्यक्रम संस्थाका सचिव रामकृष्ण कुँवरले सञ्चालन गरेका थिए ।

कार्यक्रममा वडाअध्यक्ष कुँवरले स्थापना कालदेखि नै समुदायमा आधारित रही आम बासडोलबासीको सुख दु:खमा सहकारी सारथी बनेको वताए । संस्थाको आगामि दिनहरुमा पनि प्रगतिको कामना गर्दै उनले कृषि क्षेत्रको विकासमा जोड दिन पनि आग्रह गरे ।

कार्यक्रममा संस्थाका प्रमुख सल्लाहकार मुकुन्द शर्मा वाग्लेले यो संस्था बनेपा १२ कै उत्कृष्ट संस्था रहेको र आगामी स्थापना दिवसमा ३० करोड पूँजी पुर्‍याउन सफल होस् भन्दै शुभकामना व्यक्त गरे । २०६४ सालमा स्थापना भएको उक्त संस्थाको पूँजी हाल २३ करोड रहेको छ । संस्थाले बासडोलस्थित मुख्य कार्यालय र भैसेपाटी सेवा केन्द्रबाट सेवा दिँदै आएको छ ।

कार्यक्रममा सञ्चालक समिति,उपसमितिहरु, लेखा समिती र सल्लाहकारहरुको उपस्थिति रहेको थियो । कार्यक्रमको अवसरमा केक काटेर हर्षोल्लाससमेत मनाइएको छ ।