बनेपा–नेकपा एमाले काभ्रेले यही जेठ २७ गते जिल्ला परिषद गर्ने भएको छ । २०७८ पुसमा भएको जिल्ला अधिवेशनपछि पहिलोपटक एमालेले जिल्ला परिषद आयोजना गरेको हो । 

जिल्ला सदरमुकाम धुलिखेलमा हुने परिषदको तयारी तीब्ररुपमा अघि बढेको एमाले काभ्रेका सचिव राजन भुर्तेलले जानकारी दिए । उनका अनुसार परिषदमा जिल्ला अधिवेशनमा सहभागी भएका प्रतिनिधिहरु परिषद सदस्यको रुपमा सहभागी हुनेछन् । एमाले काभ्रेका जिल्ला अधिवेशनमा १३ सय ८४ जना प्रतिनिधि रहेका थिए । एमालेको विधानमा केन्द्रीय कमिटीदेखि वडा कमिटीसम्म प्रतिनिधि परिषद रहने व्यवस्था छ । सम्वन्धीत कमिटीको अधिवेशनका प्रतिनिधिहरु नै परिषदका सदस्य हुनेछन् । जिल्ला अधिवेशन प्रतिनिधि परिषद बैठकको अध्यक्षता जिल्ला कमिटी अध्यक्षले गर्नेछन् ।

परिषदमा गत अधिवेशनपछि हालसम्म भएका पार्टी गतिविधिको समीक्षाका साथै आगामी योजनाका विषयमा छलफल हुनेछ । यस्तै राजनीतिक, संगठनात्मक र आर्थिक प्रतिवेदन परिषदमा पेश हुने सचिव भुर्तेलले जानकारी दिएका छन् ।

एमाले काभ्रेकी उपसचिव रिता ढकालका अनुसार परिषद बैठकले पार्टीका गतिविधिलाई थप क्रियाशिल बनाउन मद्दत पुग्नेछ । गत हिउँदमै परिषद गर्ने योजना रहे पनि पार्टी केन्द्रले सञ्चालन गरेको मिसन ग्रासरुट अभियानका कारण परिषद केही ढिला भएको हो । एमाले काभ्रेले परिषदमा सहभागी हुन सबै प्रतिनिधिहरुलाई आह्वान गरेको छ । 

जनप्रतिनिधिलाई प्रशिक्षण

जिल्ला परिषद अगाडि एमाले काभ्रेले यही जेठ २३ गते बनेपामा पार्टीबाट निर्वाचित भएका जनप्रतिनिधिका लागि प्रशिक्षण कार्यक्रम राखेको छ । प्रशिक्षणमा एमालेबाट स्थानीय तहको निर्वाचनमा विजयी भएका २ सय ४० जना जनप्रतिनिधि तथा पालिका कमिटीका पदाधिकारीहरु सहभागी हुनेछन् । बनेपाको कायस्थ बेंक्वेटमा हुने प्रशिक्षणमा आगामी आर्थिक बर्षको योजना तर्जुमामा जनप्रतिनिधिले खेल्नुपर्ने भूमिकाका साथै जनता र पार्टीबीचको सम्वन्धलाई अझै मजबुत कसरी बनाउन सकिन्छ भन्ने विषयमा छलफल हुनेछ ।