भकुण्डेवेसी-भूमिडाँडा बचत तथा ऋण सहकारी संस्थाको आयोजनामा आज नमोबुद्ध नगरपालिकाको भकुन्डेवेसीमा रक्तदान कार्यक्रम सम्पन्न भएको छ ।

कार्यक्रम नमोबुद्ध नगर‌पालिकाको समन्वय तथा नेपाल रेडक्रस सोसाइटी काभ्रे शाखाको सहयोगमा सम्पन्न भएको थियो ।

संस्थाका अध्यक्ष देवराज शाहको सभापतित्व तथा नमोबुद्ध नगरपालिका प्रमुख कुनसाङ लामाको प्रमुख आतिथ्यतामा सम्पन्न कार्यक्रममा ७२ जनाले फर्म भरेकोमा रक्तदानका लागि योग्य देखिएका ४० जनाले रक्तदान गरेका थिए ।

कार्यक्रममा नगर उपप्रमुख रत्न लामा, नमोबुद्ध ७ का वडा अध्यक्ष धर्मसिं लामा, नेपाल रेडक्रस सोसाइटी काभ्रे शाखाका सभापती रघुनाथ हुमागाइँ लगायतको उपस्थिती रहेको थियो ।

संस्थाका शेयर सदस्य कर्मसिं लामाले सञ्चालन गरेको कार्यक्रममा सञ्चालक सदस्य सन्तोषकुमार दाहालले स्वागत मन्तव्य राखेका थिए भने रक्तदातालाई कार्यक्रमका सभापति एवं संस्थाका अध्यक्ष शाहले प्रमाणपत्र वितरण गरेका थिए ।

कार्यक्रममा जय श्री चामुण्डा सप्लायर्स नमोबुद्ध ७, उपहार कृषि फार्म नमोबुद्ध ३ र नमोबुद्ध डेली फ्रेस, नमोबुद्ध ७ ले फलफूल लगायतका सामग्री प्रायोजन गरेका थिए ।