बासडोल (बनेपा)– बासडोल सामुदायिक बहुउद्देश्यीय सहकारी संस्था लि.को १९ औं वार्षिक साधारण सभा आज शनिबार सम्पन्न भएको छ । कार्यक्रम संस्थाका अध्यक्ष सुरेन्द्र महतको सभापतित्व एवं शेयर सदस्यसमेत रहेका बनेपा न.पा.वडा नं १२ का वडा अध्यक्ष राम बहादुर कुँवरको प्रमुख आतिथ्यतामा सम्पन्न भएको थिषे ।

विशिष्ट अतिथि संस्थापक अध्यक्ष नवराज थापा एवं सल्लाहाकारहरु, संचालक समिति, लेखा सुपरीवेक्षण समिति विभिन्न उपसमिति शेयर सदस्यहरुको उपस्थितिमा साधारण सभा सम्पन्न गरिएको थियो । उक्त साधारण सभामा ७१ प्रतिशत  सदस्यहरुको उपस्थिति रहेको थियो । उक्त साधारण सभामाले शेयर लाभांश कोषबाट ८.५९% का दरले लाभांश वितरण र संरक्षित पुँजी फिर्ता कोषबाट ऋण कारोबारका आधारमा ६.०८% र बचत कारोबार तर्फ २.२५% का दरले संरक्षित पुँजी फिर्ता गर्ने प्रस्ताव पारित गरेको छ । साथै संस्थाले साधारण सभाको अवसर पारी निर्माण गरेको भवनको वडा अध्यक्ष राम बहादुर कुँवरले  उद्घाटनसमेत गरेका छन् । 

कार्यक्रममा आर्थिक प्रतिवेदन पेश गर्दै संस्थाका कोषाध्यक्ष कल्पना कुँवरले शेयर पूँजी २ करोड ३९ लाख ३३ हजार ५ सय, सदस्य २६ सय २२, कूल निक्षेप, १८ करोड ६६ लाख ५२ हजार ६सय ७ र लगानी १८ करोड ७६ लाख ६४ हजार ५ सय ७६ र कूल सम्पत्ति २५ करोड ४३ लाख ७ हजार ७ सय ३६ रुपैयाँ रहेको जानकारी दिइन् । यस्तैे लेखा संयोजक  कञ्चन भुजेलले आर्थिक वर्ष ०८१/०८२ को प्रमुख आर्थिक सूचकहरु र संस्थाले गर्दै आएका कार्यहरु र केही सुझावहरु प्रस्तुत गरेका थिए ।

संस्थाले विभिन्न विद्यामा उत्कृष्ट हुने शेयर सदस्य ज्यूहरु, ७५ वर्ष उमेर पुरा भएका जेष्ठ सदस्यहरुलाई नगद, खादा र सम्मान पत्र द्वारा सम्मान गरिएको थियो भने संस्थाको भवन निर्माण गर्न ठेक्का पाएका ठेकेदार नीर बहादुर राईलाई समेत सम्मान पत्र र नगदद्वारा सम्मान पनि गरेको छ । यस्तै साथै भवन निर्माण सहयोगार्थ चन्दा प्रदान गर्ने सदस्यहरुलाई समेत खादा र सम्मान पत्रद्वारा सम्मान गरिएको थियो ।

संस्थाको भवन निर्माण लागत १ करोड ३० लाख ७२ हजार ४४ रुपैयाँ  रहेकोमा संचालक समिति र लेखा सुपरीवेक्षण समितिले २ लाख ५५ हजार, कर्मचारीहरुले १ लाख ५१ हजार, उपसमितिका सदस्यहरुले ६० हजार ५ सय ५५, सल्लाहाकारबाट २५ हजार र शेयर सदस्यहरुबाट ३५ हजार २५  रुपैयाँ गरी ५ लाख २६ हजार ५ सय ८० रुपैयाँ भवन निर्माण सहयोग रकम संकलन भएको संस्थाका सचिव रामकृष्ण कुँवरले जानकारी दिए । सभामा उत्कृष्ट कर्मचारीका रुपमा विगत १५ वर्ष देखि निरन्तर संस्थामा कार्य गरिरहनु भएका संस्थाका प्रमुख कार्यकारी अधिकृत अनन्तप्रसाद तिमल्सिना लाई प्रशंसा पत्र, खादा र नगद द्वारा सम्मान गरिएको थियो ।