साँगा– नेपाल पुलिस स्कुल साँगा काभ्रेको आयोजनामा मंसिर १८ देखी संचालन भईरहेको ३०औं अन्तर माध्यामिक विद्यालय आइजीपी फुटबल रनिङ ट्रफी प्रतियोगिता २०८१ को दोस्रो दिन तिन खेलहरु सम्पन्न भएका छन् । 

आज भएको दिनको पहिलो खेलमा डिएभी स्कुल जावलाखेलले नेपाल पुलिस स्कुल सामाखुसीलाई २–० गोल अन्तरले हरायो । विजयी टिमका लागी खेलको ८औं मिनेटमा अनुज थापा र खेलको ३१औं मिनेटमा आर्नवमान क्षेत्रीले गोल गरे । म्यान अफ दि म्याच विजयी टिमका अनुज थापा घोषित भए । दिनको दोस्रो खेलमा पहिलो पटक प्रतियोगितामा भाग लिईरहेको नेपाल पुलिस स्कुल दाङले सागाँको स्थानीय विद्यालय ग्रेसल्याण्ड स्कुललाई ३–० गोल अन्तरले हरायो । एकतर्फी खेलमा विजयी टिमको लागि खेलको तेस्रो मिनेटमैगोल गर्दै  नविन ओलीले खाता खोले । खेलको २८औ र ५७ औ मिनेटमा म्यान अफ दि म्याच देब बहादुर ओलीले गोल गरि अग्रता तेब्बर पारेका थिए । 

दिनको तेस्रो तथा अन्तिम खेलमा गत संस्करणको विजेता सैनिक आवासिय महाविद्यालय भक्तपुर र यो बर्षको नवप्रवेशी बालउद्दार मावि बुढानिलकण्ठले गोलरहित बराबरि खेलेका छन् । निकै रोमान्चक खेलमा दुवै टिमबाट गोल गर्ने धेरै अवसरहरु सिर्जना भए तापनि गोल हुन नसक्दा उपाधीको दावेदार टिम मानिएको सैनिक स्कुल १–१ अंक बाड्न बाध्य रह्यो । उत्कृष्ट खेल कौशन प्रदर्शन गरेको बालउद्दार माविका खेलाडी किस्मत राई म्यान अफ दि म्याच घोषित भए । 

भोली तेस्रो दिन पनि तिन खेल खेलिनेछ । पहिलो खेलमा नेपाल पुलिस स्कुल धरानले विकटेश्वर स्कुलको सामना गर्नेछ । दोस्रो खेलमा नाइटिङ्गेल स्कुलले मनकामना स्कुलसँग प्रतिस्पर्धा गर्नेछ भने अर्को खेलमा आयोजकको टिम नेपाल पुलिस स्कुल ब्लु र ल्याब स्कुल आमने सामने हुनेछन् । लिग कम नकआउट आधारमा सञ्चालन भईरहेको यो प्रतियोगिता पौषको पहिलो सातासम्म चल्नेछ । 

प्रतियोगिताका विजेताहरूलाई नगद पुरस्कारसहित ट्रफी, मेडल र प्रमाणपत्र प्रदान गरिनेछ । पहिलो, दोस्रो र तेस्रो स्थान प्राप्त गर्ने टिमहरूले क्रमशः ६० हजार, ४० हजार र  २०,००० पाउनेछन् । साथै, उत्कृष्ट खेलाडीहरूलाई व्यक्तिगत विधामा विशेष पुरस्कार प्रदान गरिनेछ ।